Ўзбекистон Республикаси Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги томонидан Тошкент вилояти Нурафшон шаҳрида сайёр қабул ўтказилди. Мазкур тадбирда аҳолидан электр энергияси, ичимлик суви, йўлларни таъмирлаш, коммунал ва бошқа соҳалар бўйича мурожаатлар келиб тушди.
Шундай мурожаатлардан бири 2019 йилда банк кредити ҳисобидан квартира сотиб олган Гавҳар Қурбонованинг Нурафшон шаҳрида бунёд этилган кўп қаватли уйлар учун кўрсатилаётган коммунал хизматлардан норози эканлигини билдирган. Ушбу уйда истиқомат қилувчи аҳоли номидан тегишли соҳа вакилларига бир неча маротаба мурожаат қилинишига қарамасдан, масала бугунги кунгача ҳал қилинмаганлиги, уйнинг атрофига эса оқава чиқинди сувлари сизиб чиқишидан норози эканликларини билдирган.
Хусусан, бу мурожаат орқасида 10 та уйнинг 420 та хонадони борлиги, уларни канализация тармоғи муаммоси қийнаб келаётгани бўйича кўп қаватли уйларда вилоят “Сувоқова” ДУК, вилоят “Қурилиш назорат инспекцияси”, Нурафшон шаҳар “Сантария-эпидемиологик осойишталик маркази” ДУК ҳамда кўп қаватли уйларни қурган ташкилотнинг тегишли ходимлари иштирокида ўрганиш ишлари олиб борилди.
Ҳақиқатдан ҳам янги уйларда насос ишлатилмаганлиги оқибатида ҳовли 3-4 метр чуқурликдаги ҳандакда чиқинди сувлар тўплангани, бу эса атроф-муҳитга салбий таъсир кўрсатаётгани маълум бўлди. Мазкур мурожаатда келтирилган ҳолат тегишли ташкилотлар билан биргаликда шу куннинг ўзидаёқ бартараф этилди. Хонадон эгалари ушбу камчиликларни бартараф этилиши бўйича Агентликка ўзларининг миннатдорчиликларини билдиришди.
8,508