“Ўзбекистон темир йўллари” АЖга қарашли йўловчи ташувчи поездининг “Бухоро-Тошкент” йўналиши бўйича истеъмолчи Ш.Х https://e-ticket.railway.uz сайти орқали 116 940 сўмга электрон чипта харид қилади. Тўловни эса “Click”тизими орқали амалга оширади. Яратилган бундай қулайлик ва тежалган вақтидан истеъмолчи хурсанд бўлди. Аммо хурсандчилиги узоққа чўзилмади. Навоий вилояти Қизилтепа туманида жойлашган темир йўл бекатига келганида хизмат кўрсатувчи чипта рўйхатда кўринмаётганлигини айтиб ўтди.Қайта- қайта уринишлар зое кетди, электрон чипта эса топилмади.
Бу орада позеднинг жўнаш вақти келганлиги сабабли йўловчи Ш.Х. 118 600 сўмга қайта чипта сотиб олишга мажбур бўлади. Манзилига етиб келиб Тошкент шаҳридаги темир йўл вокзалидан бу ҳақда маълумот сўрайди. Унга жавобан чипта онлайн рўйхатдан ўтганлиги, аммо поезд кетиб бўлганлиги сабабли чипта пулини қайтариб бериш имкони йўқлигини билдиришади.
Бу ҳақда истеъмолчилар ҳуқуқларини ҳимоя қилиш агентлигига тушган мурожаат Навоий вилоятига йўналтирилди. Агентликнинг мазкур вилоят ҳудудий тузилмаси “Ўзтемирйўлйўловчи” АЖ Бухоро филиалига мурожаат юзасидан сўров юборди.
Агентликка маълум бўлишича, Қизилтепа туманидаги темир йўл бекатига тегишли касса ходими Ф.Хнинг масъулиятсизлиги оқибатида истеъмолчи қайта чипта харид қилишга мажбур бўлган. Филиал томонидан иккинчи маротаба харид қилинган 118 600 миқдоридаги чипта пули қоплаб берилишига эришилди.
Шунингдек, масъулиятсизликка йўл қўйган ходим Ф.Х Ўзбекистон Республикаси Меҳнат Кодексида белгиланган тартибда интизомий жазо чорасини олди.
7,375