Savol:
Hisoblagichlarni (gaz, elektr energiyasi, ichimlik va issiq suv) metrologiya qiyoslovidan o‘tkazish kimning zimmasida va qanday tartibda amalga oshiriladi?

HISOBLAGICh QIYoSLOVDAGI YaNGILIK:
Javob: O‘zbekiston Respublikasi Vazirlar Mahkamasining 2019 yil
20 avgustdagi “Yuridik va jismoniy shaxslarning elektr energiyasi, tabiiy gaz, ichimlik va issiq suvni hisobga olish uskunalarini (hisoblagichlarni) yechish, qiyoslashdan o‘tkazish va o‘rnatish bo‘yicha davlat xizmatlari ko‘rsatishning ma’muriy reglamentlarini tasdiqlash to‘g‘risida”gi 698-sonli qarori qabul qilingan.
Ushbu qaror bilan tasdiqlangan Ma’muriy reglamentlarga asosan:
hududiy elektr tarmoqlari, hududiy gaz ta’minoti, hududiy issiqlik ta’minoti va suv ta’minoti korxonalari hisobga olish uskunalarini yechish va o‘rnatishni, yechib olingan hisobga olish uskunalarini «O‘zstandart» agentligining davlat metrologiya xizmati organlarida qiyoslashdan o‘tkazishga taqdim etish ishlarini amalga oshiradi;
O‘zbekiston Respublikasi Bosh prokuraturasi huzuridagi Majburiy ijro byurosining hududiy bo‘linmalari barcha jarayonlarda ta’minotchi korxonalar bilan hamkorlik qiladi, hisobga olish uskunalariga tamg‘a (plomba) qo‘yishni amalga oshiradi;
metrologiya xizmati yechilgan hisobga olish uskunalarini qiyoslashdan o‘tkazish bilan bog‘liq ishlarni amalga oshiradi;
talabgorlar yechilgan hisobga olish uskunalarini o‘rnatish va yechish uchun zarur sharoit yaratadi va ushbu jarayonda ishtirok etadi deb belgilab qo‘yilgan.
Hisobga olish uskunalarini qiyoslashdan o‘tkazish metrologiya xizmati tomonidan qonunchilikka muvofiq amalga oshiriladi.
Hisobga olish uskunasini davriy tekshiruvdan o‘tkazishning amal qilish muddati tugashidan 30 kun oldin talabgorni hisobga olish uskunasini davriy tekshiruvdan o‘tkazish zarurligi haqida yozma ravishda ogohlantiradi.
Talabgorning kommunal tashkilotlar tomonidan belgilangan muddatda rasmiy ravishda ogohlantirilmasligi hisobga olish uskunalarini o‘z vaqtida qiyoslovdan o‘tkazmaganlik uchun aybdorlikni keltirib chiqarmaydi.
Talabgor hisobga olish uskunasini qiyoslashdan o‘tkazish uchun murojaat qilganda, hisobga olish uskunasi kommunal tashkilotlar tomonidan dalolatnoma bilan birga metrologiya xizmatiga topshiriladi.
Hisobga olish uskunasi ta’minotchi korxonadan qabul qilib olinganidan so‘ng 3 ish kuni ichida metrologiya xizmati tomonidan qiyoslashdan o‘tkaziladi.
Hisobga olish uskunasini qiyoslashdan o‘tkazish natijasi ijobiy bo‘lgan taqdirda, hisobga olish uskunasi foydalanishga yaroqli deb topiladi va metrologiya xizmati tomonidan hisobga olish uskunasining qiyoslashdan o‘tkazilganligi haqida sertifikat rasmiylashtiriladi.
Kommunal tashkilotlar va Byuro xodimlari hisobga olish uskunasini qiyoslashdan o‘tkazgandan keyin 3 ish kuni ichida talabgor bilan kelishilgan vaqtda talabgor ishtirokida ushbu Reglamentga 5-6-ilovalarga muvofiq hisobga olish uskunasini o‘rnatish to‘g‘risida uch nusxada tegishli dalolatnoma tuzgan holda tamg‘alaydi. Dalolatnomaning bir nusxasi talabgorda qoldiriladi.
Talabgor yoki uning vakili kelishilgan vaqtda va manzilda bo‘lmagan taqdirda, bu haqda xolislar ishtirokida dalolatnoma tuzilib, fuqarolarning o‘zini o‘zi boshqarish organi muhri bilan rasmiylashtirilishi belgilangan.